30 января 2008 г.
И.Н.Ульянов ячĕллĕ Чăваш патшалăх университечĕн проректорне, ЧР Патшалăх Канашĕн депутатне, республика парламентĕнчи «Единая Россия» фракци членне О.Викторова пирĕн районта пурăнакансем лайăх пĕлеççĕ. Олег Николаевич район ĕç-хĕлне хастар хутшăнать, ял çыннисене май килнĕ таран пулăшма тăрăшать. Акă, иртнĕ çулта вăл Уçырма, Шаккăл, Сиккасси, Шелттем ял тăрăхĕсенче пулса унта пурăнакансен ыйтăвĕсемпе кăсăкланнăччĕ. «Уçырмара çĕнĕ урамсене электричествăпа тивĕçтермешкĕн пулăшма ыйтрĕç. Кун пирки «Чăвашэнерго» АУО ертÿçисемпе калаçрăм. Вĕсем проблемăна татса пама шантараççĕ. Шелттемре ялти библиотекăра çĕнĕ кĕнекесем çителĕксĕрри пирки пăшăрханса пĕлтерчĕç. Çак ыйтăва та тивĕçтерĕпĕр», - тет О.Викторов. Вăл Уçырма тата Шелттем ял тăрăхĕсене «Республика» тата «Тантăш» хаçатсем çырăнса панă.
О.Викторов депутатăн пушă вăхăт çук тесен пĕртте йăнăш пулмĕ. Кану кунĕсенче те тăтăшах çула тухать вăл, Елчĕк, Шăмăршă, Патăрьел, Комсомольски районĕсенчи суйлавçăсемпе тĕл пулать. «Студентсемпе вĕсен ашшĕ-амăшĕсем ман пата час-часах ĕç вырăнне пыраççĕ. Общежитире пурăнма пÿлĕм тупса пама ыйтаççĕ нумайăшĕ. Çулсерен 2, 5 пин таран студента вĕренме илетпĕр университета. Вĕсенчен 700-шĕ Раççейри 50 регионтан килнĕ. Ют çĕршыв çамрăкĕсем те вĕренеççĕ пирĕн патăрта. Пурне те пулăшма тăрăшатпăр», - пĕлтерет Олег Николаевич.
Иртнĕ шăматкун О.Викторов депутат район администрацийĕнче Канаш тăрăхĕнче пурăнакан суйлавçăсене харпăр-хăй ыйтăвĕсемпе йышăнчĕ.
А.ВЛАДИМИРОВ.
Источник: "Канаш"