19 декабря 2007 г.
Чăваш Республикин Патшалăх Канашĕн депутачĕн, Вăрнарти хутăш препаратсен завочĕн генеральнăй директорĕн Владимир Свешниковăн парнисене çĕнсе илессишĕн республика шайĕнче иртекен турнирĕ кăçал ытларах кĕрешÿçĕне пуçтарнă. Кавир çине Муркаш, Хĕрлĕ Чутай, Шупашкар, Çĕрпÿ, Красноармейски, Канаш, Вăрнар районĕсен çамрăк спортсменĕсем тухнă, пĕтĕмпе вунпĕр команда.
Арçын ачасем – çичĕ, хĕрачасем пилĕк виçе категорийĕнче тупăшнă. Вăрнар кĕрешÿçисем асăннă турнирта яланхиллех пысăк ăсталăх кăтартнă, призлă вырăнсене чылай йышăннă. Çĕнтерÿçĕсем йышĕнче пысăк ăмăртусенче палăрнă спортсменсем çеç мар, кĕрешÿре пĕрремĕш çитĕнÿ тăвакансем пурри те савăнтарать.
Çакна та каламалла: ачасемпе çамрăксен Вăрнарти спорт шкулĕн Пăртасри филиалĕн вĕренекенĕсем çулталăк хушшинчех пысăк ăсталăхлă кĕрешÿçĕсен йышне кĕме пултарчĕç. Ку турнирта та акă пиллĕкĕн тан çĕнтерÿ пьедесталĕн пусмисем çине хăпарма тивĕçнĕ, вĕсем – Николай Галкин, Евгений Колпаков, Таня Александрова (иккĕмĕш вырăн), Альбина Андреевапа Вероника Бартасова (виççĕмĕш вырăн).
Харпăр хăй виçе категорийĕнче çавăн пекех Роман Львов, Дмитрий Яковлев (Вăрнар) тата Анна Краснова (Мăн Явăш) ылтăн призерсем пулса тăнă. Гаджи Лосевпа Петр Квасов (Вăрнар), Екатерина Алексеева (Мăн Явăш) – кĕмĕл призерсем. Алексей Уткин, Сергей Кириллов, Сергей Семенов, Владислав Ежов, Максим Васильев (Вăрнар), Таня Кондратьева, Анна Федотова (Мăн Явăш) виççĕмĕш вырăнсене йышăннă. Тренерĕсем – В.Трофимов, А.Павлов, А.Васильев, Ю.Львов, А.Воробьев.
Кирек мĕнле ăмăрту та тупăшаслăха ÿстерет, малалла туртăнма май парать. Вĕсене йĕркелеме пулăшакансем пурри вара спортсменсене уйрăмах хавхалантарать. Асăннă турнира ирттерме спонсорла пулăшу панăшăн, парнесемпе тивĕçтернĕшĕн кĕрешÿçĕсемпе тренерсем ЧР Патшалăх Канашĕн депутатне, хутăш препаратсен завочĕн генеральнăй директорне Владимир Васильевич Свешникова чĕререн тав тăваççĕ.
Источник: "Çĕнтерÿ çуле"