18 июня 2007 г.
Трак ен ĕçченĕсем 55-мĕш Акатуйра, çанталăк ăшах мар пулин те, кунĕпех çурçĕр енчен сивĕ çил вĕрсе тăчĕ, хĕвелĕ çураçма килнĕ чухнехи хĕр пек, вăхăтăн-вăхăтăн пĕлĕтсем хыçĕнчен вăрттăн пăхкаласа илчĕ, тулли кăмăлпа савăнчĕç. Сăлтавĕ те çук мар. Район пĕрчĕллĕ тата пăрçа йышши культурăсем акмалли плана ирттерсе тултарнă. Иртнĕ пилĕк уйăхра аш-какай, сĕт пĕлтĕрхинчен ытларах туса илнĕ. Вĕренÿпе культурăра та ÿсĕмсем çук мар. Районти 8 педагог — РФ Президенчĕн, 2-ĕн ЧР Президенчĕн грантне, райцентрти 2-мĕш шкул 1 миллион, Мăн Шетмĕри Совет Союзĕн Геройĕ В. Васильев ячĕллĕ шкул 200 пин тенкĕне тивĕçнĕ тата ытти те. Физкультурăпа спорт ĕçне йĕркелес тĕлĕшпе район республикăри районсем хушшинче — виççĕмĕш, Заволжски ЛПУМГ вара пĕрремĕш вырăн йышăннă.
Красноармейски вăрманĕ çумĕнчи лапам ир-ирех капăр тум тăхăннă, унта та кунта чуна хăпартлантаракан плакатсемпе ялавсем вĕлкĕ-шеççĕ. Хаваслă кĕвĕ янăрать. Кĕç В. Данилов журналист хатĕрленĕ “Маттур Трак ен хастарĕсем” радиорепортаж янăрама пуçларĕ. Вăл 40 минута пычĕ. Таврана паçăрах тутлă апат-çимĕç — техĕмлĕ шÿрпепе шашлăк — шăрши сарăлнă, сăмсана кăтăклать, астивме, тутанса пăхма чĕнет. Стадионăн хĕвел тухăç енче тĕрлĕ апат-çимĕçпе промышленность таварĕсем сĕнекен суту-илÿ точкисем вырнаçнă. Вĕсем хушшинче райпопа уйрăм предпринимательсен магазинĕсем те пур. Ку ретрех “Талант — халăх пуянлăхĕ” — шкул ачисемпе уйрăм çынсен ал ĕçĕсен куравне йĕркеленĕ. Унран çÿлерех вара карусель вырнаçнă. Мăн Шетмĕ ял тăрăхĕн ачасене илĕртекен çак хатĕрĕ ир-ирех ача-пăчапа яш-кĕрĕме хăй патне йыхравларĕ. Сăмах май, унпа вуншар ача ярăнса хăй кăмăлне тултарчĕ. Стадионăн кăнтăр енне спортăн 11 енĕпе тупăшма хатĕрленĕ. Кунта кăмăл пуррисем пĕчĕк калибрлă винтовкăран тĕл пеме, шашка-шахматла, пляж волейболĕлле выляма, кире пуканĕ çĕклеме, ал вăйне виçме, михĕпе çапса кĕрешме, баскетбол мечĕкне ывăтса ункăна кĕртме, шăчă çине хăпарассипе тупăшма, ирĕклĕ майпа кĕрешме, дартс енĕпе ăмăртма тата ытти те пултарчĕç.
Ĕçпе юрă уявне уçма пурте хатĕр. Палăртнă вăхăтра “Çур аки-2006” чемпионĕпе” “Выльăх-чĕрлĕх пăхакан чемпион-2006” В. Филипповпа (“Кр.Сормово”) Ф. Степанова (“Караево”) “Асран кайми аки-сухи” юрă çеммипе Акатуй ялавне çĕклерĕç. Районпа хуçалăхсен ертÿçисем, республика представителĕсем, ку делегацие ЧР ял хуçалăх министрĕ М. Игнатьев ертсе пырать, чĕннĕ хăнасем трибуна çине улăхаççĕ. Вĕсене халăх фольклор ушкăнĕ çăкăр-тăварпа, кăпăклă сăрапа кĕтсе илчĕ. Район пуçлăхĕ, кĕске сăмах каласа, “Ача çулталăкне” халалланă Акатуй уявĕ уçăлни çинчен пĕлтерет.
Çакна çирĕплетсе “Çур аки-2007” чемпионĕ” Олег Васильев (“Таябинка”) — Раççей, В. Васильева ХФХ ертÿçи В. Васильева — Чăваш Республикин, “Чемпион выльăх пăхакан-2007” Елена Васильева (“Красное Сормово”) хамăр район ялавĕсене çĕклерĕç.
Район пуçлăхĕ С. Николаев Акатуя килнĕ халăха тата хăнасене уяв ячĕпе ăшшăн саламланă хыççăн Трак енсем хăйсен 55-мĕш Ĕçпе юрă уявне мĕнле кăтартусемпе кĕтсе илнипе паллаштарчĕ. Ун сăмахĕнчи хăш-пĕр цифрăсене илсе кăтартар-ха: кăçал пĕрчĕллĕ тата пăрçа йышши культурăсем — 10400, çĕр улми 449 гектар лаптăк йышăнаççĕ. Пĕлтĕрхинчен минераллă удобрени 1, 5 хут ытларах çĕре хывнă. Çурхи уй-хир ĕçĕсем ирттерме 13 миллион тенкĕлĕх кредит илнĕ. Уйсене йышăнакан комисси “Таябинка” уйĕсем чи лайăххисем тесе пĕлтернĕ. “Гигантпа” “Караево” — иккĕмĕш, “Нивăпа” “Красное Сормово”, “Волит” — виççĕмĕш, хресчен-фермер хуçалăхĕсенчен В. Васильева ХФХ — пĕрремĕш, В. Шумиловăн — иккĕмĕш, “Заря” виççĕмĕш вырăнсем йышăнса, район администрацийĕн пĕрремĕшпе иккĕмĕш тата виççĕмĕш степеньлĕ дипломĕсене тивĕçнĕ. Станислав Андреевич çур акинче тата выльăх-чĕрлĕх отраслĕнче, çавăн пекех культурăпа вĕрентÿ системинче тăрăшакан вуншар çын ятне ырăпа асăнчĕ, ытти коллективсен ĕçри çитĕнĕвĕсем çинчен пĕлтерчĕ, “Ачасен ячĕпе, ачалăхшăн” районти ыр кăмăллăх марафона хутшăнса палăрнă предприяти-организацисене, уйрăм предпринимательсене ырларĕ, район ĕçченĕсем умĕнче тăракан задачăсем çинче чарăнса тăчĕ.
Шĕкĕр хуламăртан пирĕн район ĕçченĕсене саламлама пысăк делегаци килнĕ. Праçнике пуçтарăннисене вĕсен ячĕпе ЧР ял хуçалăх министрĕ М. Игнатьев саламларĕ, ЧР Президенчĕн саламлă çырăвне вуласа пачĕ. Михаил Васильевич пушă алăпа килмен, вăл приоритетлă наци проектне пурнăçа кĕртме пирĕн районти вĕрентÿ тытăмне 4 миллиона яхăн, çурт-йĕр лартма тата туянма 5 миллион ытла, ялсене хытă сийлĕ çул çитерме 623 миллион тенкĕ укçа уйăрнине çирĕплетекен сертификатсене район пуçлăхне Станислав Николаева пачĕ. “Караево” хуçалăхри ĕне сăвакан çамрăксене — Алина Петровапа Ольга Ермолаевана ЧР Президенчĕн стипендиачĕ пулнине çирĕплетекен свидетельствăсем пачĕ. М. Игнатьев “АПК аталанăвĕ” наци проекчĕ шучĕпе паракан çăмăллăхлă кредитпа çине тăрса усă курса юлма, арçынсене çав укçапа хăйсен мăшăрĕсен ĕçне çăмăллатма ĕне сумалли аппаратсем илсе пама сĕнчĕ. Юлашкинчен аш-какай, сĕт ытларах туса илес тесен, çине тăрсах выльăх-чĕрлĕх валли выльăх апачĕ хатĕрлеме хастар кÿлĕнмелли пирки асилтерчĕ.
Район çыннисене çавăн пекех ЧР Патшалăх Канашĕн депутачĕсем, “Единая Россия” фракци членĕсем И. В. Мадяновпа В. В. Андреев, Шупашкарти “Трак ен” ентешлĕх председателĕ А. Н. Львов тата ыттисем саламласа, ырлăх-сывлăх сунчĕç.
“Трак ен” ентешлĕх членĕсем, Г. Н. Николаевпа Н. Г. Егоров художниксем хăйсен картинисене, 10 ытла ĕç, Элли Юрьев музейне парнелерĕç. Çавăн пек ырă кăмăллăх кăтартнăшăн Станислав Андреевич вĕсене ăшшăн тав турĕ.
Кун хыççăн ĕç паттăрĕсене, вĕсен хисепĕ 50-ран иртрĕ, хаклă парнесемпе, ЧР Ял хуçалăх министерствин наградисемпе — 3, район администрацийĕн хисеп грамотипе 5 çынна чысларĕç.
Унтан районăн пĕрлештернĕ хорĕ уява малалла тăсрĕ. Вăл концерта район гимнне юрланинчен пуçларĕ. Сцена çинче пĕр пултарулăх ушкăнĕ теприне ылмаштарчĕ, концерт 4 сехет ытла пычĕ. Тĕрлĕ халăх юррисем янăрарĕç, ташăсем те сахалах мар пулчĕç. Сцена çинче Трак тăрăхĕнчи юрă-ташă ăстисем кăна мар, Шупашкарпа Çĕрпÿ районĕсенчен тата Тюмень облаçĕнчен килнисем те хăйсен пултарулăхне туллин кăтартрĕç. Вĕсене пурне те Акатуйăн дипломĕсене парса чыс турĕç. Тунсăхлама вăхăт пулмарĕ Ĕçпе юрă уявĕнче. Спортăн тĕрлĕ енĕсемпе тупăшма пултарчĕ кашни кăмăл тăваканах. Çĕнтерÿçĕсем вара ятарлă призсемлĕ пулчĕç. Концертпа тупăшмалла тенĕ пекех, стадион анинче республикăри футбол чемпионачĕн шучĕпе Трак енри “Факелпа” Сĕнтĕрвăр-ринчи “Водник” клубсем хушшинче пĕрремĕш вăйă иртрĕ. Ку тĕл пулура пирĕннисем хăнасене 2:0 шутпа парăнтарчĕç, уява пынисене хăйне май парне кÿчĕç. Мечĕксене пĕрремĕш таймра вăйăра — Денис Тян, Виктор Тишкин (пенальтипе) тапса кĕртрĕç.
55-мĕш Ĕçпе юрă уявĕнче ялсемпе предприятисен, социаллă учрежденисен территорийĕсене, уйрăм çынсен хуçалăхĕсене тирпей-илем кĕртсе симĕслентерес тĕлĕшпе палăрнисене район администрацийĕн дипломĕсемпе, укçан премисемпе чысларĕç. Тĕслĕхрен, Уйриçурт ялĕ — виççĕмĕш, Красноармейскинчи газ участокĕ — пĕрремĕш, Чатукассинчи ватă çынсен çурчĕ — пĕрремĕш, Пăрăнтăкри А. И. Антоновпа Танăшри В. А. Андреев хуçалăхĕсем иккĕмĕшпе виççĕмĕш степеньлĕ дипломсене тивĕçрĕç.
Çапла, интереслĕ иртрĕ Красноармейскинче Акатуй уявĕ, унта пынисене çанталăкĕ сивĕрех пулни те ытлах чăрмантараймарĕ. Обществăлла апатлану предприятийĕсем, суту-итлÿ точкисем вĕсен ыйтăвĕсене туллин тивĕçтерме тăрăшрĕç. Пĕр сăмахпа каласан, ĕçрен самантлăха пушаннă çĕр ĕçченĕ кунта хăйне май канчĕ, ут çи умĕн вăй-хал пухрĕ.
В. ЕГОРОВ
Источник: "Ял пурнăçĕ" (Красноармейская районная газета)