09 июня 2007 г.
ĔЛĔКРЕН пыракан ырă йăлапа, çурхи уй-хир ĕçĕсем вĕçленнĕ хыççăн пирĕн халăх Акатуй ирттерет. Шăмăршă тăрăхĕнче пурăнакан чăвашсем, тутарсем, вырăссем, ирçесем алла-аллăн тытăнса, туслăн килĕштерсе ĕçлеççĕ кăна мар, уявра савăнма та пĕлеççĕ.
Кăçалхи Акатуй пирĕншĕн уйрăмах паллă: тăван районăмăр 80 çул тултарать. Чăнах та, 80 çул историшĕн вăрăм тапхăр мар. Анчах та, район сакăр теçетке çул хушшинче тунă ĕçсене шутлама тăрсан, юмахри пек пысăк утăмсем тунине асăрхатăн. Хăйне официаллă йĕркепе район статусне париччен, Шăмăршă тăрăхĕ Чăваш Енри чи тĕттĕм те кайри кĕтессенчен пĕри шутланнине манма юрамасть. Паян вара Шăмăршă районĕ социаллă пурнăçпа экономика аталанăвĕпе – республикăра малтисен шутĕнче.
Район иртнĕ 20-25 çул хушшинче уйрăмах çĕнелсе улшăнчĕ. Çул-йĕр, тимĕр-бетон кĕперсем, шкулсемпе ача сачĕсем, культурăпа сывлăх учрежденийĕсем нумай тунă. Районта пурăнмалли çурт-йĕр тăвас ĕç хăвăртлăхĕ те пысăк. Пирĕн ялсем илемленсех, çĕнелсех пыраççĕ.
Районти кашни ялтах çуртсене çут çанталăк газĕ ăшăтать, часах Чăваш Республикин Президенчĕн «Ĕçмелли таса шыв» программи те пурнăçа кĕрĕ. Çул-йĕр строительствинче те тĕлĕнмелле пысăк утăмсем тумалла: Чăваш Республикин Президенчĕн Н.В.Федоровăн «Чăваш Республикин автомобиль çулĕсене тăвассине хăвăрт вĕçлес енĕпе пурнăçламалли мерăсем çинчен» Указĕпе килĕшÿллĕн, районта кăçал «Шăмăршă – Суйкăн», «Ирçе Тĕкки – Баскак», «Шăмăршă – Анат Чаткас – Хĕрлĕ Васан», «Канаш паççулкки – Пăва-Çĕпрел трасса» çулсене хута ямалла.
Ялсен урамĕсене çул сарма та район бюджетĕнчен нихçанхинчен нумайрах – 25 миллион тенкĕ уйăрнă. Пĕр-икĕ çул хушшинче районти ялсенче пылчăк çăрăлакан пĕр урам та ан юлтăр тесен, çул тăвакансен ир тытăнса тĕттĕмччен, канмалли кунсенче те пысăк тухăçлăх кăтартса ĕçлемелле.
Районта «Единая Россия» парти пуçарнипе йышăннă «АПК аталанăвĕ», «Пурăнмалли çурт-йĕр», «Сывлăх», «Вĕрентÿ» наци проекчĕсем тухăçлă ĕçлеççĕ. Патшалăх ял хуçалăхне ура çине тăратассишĕн тăрăшакан пуçаруллă çынсене çăмăллăхлă кредит парса пулăшать. Наци проекчĕпе килĕшÿллĕн, районта 2015 çулчченхи тапхăр валли ятарлă программа туса хатĕрленĕ, унта выльăх-чĕрлĕх отрасльне аталантарасси çине пысăк тимлĕх уйăрма пăхрăмăр. Хуçалăхсенче сакăр фермăна тĕпрен çĕнетмелле е çĕнĕ витесем тумалла. Çакна пурнăçлама патшалăхран 8 миллионтан пуçласа 52 миллион тенкĕ таран çăмăллăхлă кредит илеççĕ.
Чăваш Республикин Патшалăх Канашĕн депутачĕ, хамăр ентеш В.Ф.Ермолаев Шăмăршă районĕнче темиçе пин пуç сысна ĕрчетмелли комплекс, кайăк-кĕшĕк усрамалли ферма тума сăмах пани пурнăçа кĕрессе эпир шанса тăратпăр. Ял çыннисем валли ĕç вырăнĕсем нумайланĕç, халăх пурнăçĕ лайăхлансах пырĕ.
Эпир кашни ял поселенийĕнчех потребитель кооперативне йĕркелеме тĕллев лартрăмăр. Çывăх вăхăтра вĕсем тулли хăватпа ĕçлесе кайĕç, халăхран килти хуçалăхра туса илнĕ выльăх-чĕрлĕх продукчĕсем туянас тата ĕçе кĕртес тĕлĕшпе ĕçлĕç.
Район çурхи ака-суха ĕçĕсене республикăра малтисен шутĕнче, пысăк пахалăхпа вĕçлерĕ. Халĕ пирĕн мĕн акни-лартнине пăхса ÿстерес тĕлĕшпе чунтан тăрăшса ĕçлемелле. Хресчен ĕçĕ çапла вăл: нихăçан та вĕçленмест, пĕр ĕç хыççăн тепри тупăнсах тăрать. Утă çулма тухасси те инçе мар, ун хыççăн тырпула пуçтарса кĕртме хатĕрленмелле. Ял ĕçченĕсем, фермер хуçалăхĕсем, кашни çын тăван район яланах малта пытăр, тирпей-илемпе те илĕртсе тăтăр тесе тăрăшсан, Шăмăршă тăрăхĕн ячĕ-сумĕ татах та çĕкленĕ.
Уяв ячĕпе сире, район çыннисемпе хăнасем! Ваттисем каланă пек, акара авăнар, Акатуйра вара чунтан савăнар!
В. ФАДЕЕВ
Источник: "Шăмăршă хыпарĕ"