Новости » Тăван район аталанни савăнтарать, ĕçлес кăмăла çĕклет

Чăваш Республикин Патшалăх Канашĕн 5-мĕш созывĕ ĕçе пуçăннăранпа çулталăк иртрĕ. Çак созывра пирĕн районтан икĕ депутат суйланнине вулакансем лайăх пĕлеççĕ ĕнтĕ. Вĕсем – Петр Краснов тата Кияметдин Мифтахутдинов. Петр Степанович - Патшалăх Канашĕн социаллă политикăпа наци ыйтăвĕсен комитечĕн председателĕ, Кияметдин Садыртдинович вара «Газпром межрегионгаз Чебоксары» тата «Чувашсетьгаз» предприятисене чылай çул ертсе пырать. Иккĕшĕ те - Патшалăх Канашĕн Президиумĕн членĕсем. Паллах, ентеш-депутатсем район интересĕсене республика шайĕнче хÿтĕлеççĕ, хамăр тăрăхри социаллă тата экономика ыйтăвĕсене татса пама пулăшаççĕ. Иртнĕ кунсенче пулнă тĕл пулура вĕсем çак хушăра мĕнле ĕçсем туса ирттернине каласа пама кăмăл турĕç.

– Петр Степанович, Кияметдин Садртдинович, сирĕншĕн тата Комсомольски районĕшĕн çулталăк тухăçлă иртрĕ пуль тесе шутлатăп?

П.Краснов: - Эпĕ те çаплах шутлатăп. Мана юлташсем шанса комисси председателĕ пулма суйларĕç. Хыçа юлнă 2012 çула илсен, вăл пирĕн районшăн социаллă çул пулчĕ тесен те тĕрĕс. Республика Пуçлăхĕ М.В.Игнатьев ку енĕпе нумай Указ кăларчĕ. Пирĕн вара, депутатсен, нумай ачаллă çемьесене, ачасене, ĕç ветеранĕсене хÿтĕлесси пирки чылай саккун йышăнма тиврĕ. Чăваш Ен Пуçлăхĕн «Чăваш Республикин Ĕç ветеранĕсем çинчен» Указĕпе килĕшÿллĕн акă ар çынсем 45, хĕрарăмсем 40 çул стажпа, орден-медаль пулмасан та, çак хисеплĕ ята илме пуçларĕç. Çулталăкра хисеплĕ ята республикипе 20 пин ытла çын, Комсомольски районĕнче 500 ытла çын илме ĕлкĕрчĕ. Вĕсем тата та йышланĕç-ха. «ЧР Ĕç ветеранĕ» ят пуррисен пенсийĕ çумне уйăхсерен 1026 тенкĕ (индексациленĕ хыççăн) хушса тÿлени ватăсене самаях сисĕмлĕ пулăшу-çке.

К.Мифтахутдинов: - Петр Степанович шухăшне малалла тăсса ытти саккунсем çинчен те хушса калас килет. 2012 çулхи январĕн 1-мĕшĕнчен Чăваш Республики виççĕмĕш ачашăн 100 пин тенкĕлĕх амăш капиталне пама пуçлани те - çĕнĕлĕх.

Кирек хăш пепкен те ача çуртĕнче мар, çемьере ÿсмелле, воспитани илмелле. Чăваш Ен правительстви те тăлăх ачасем сахалрах пулччăр тесе тĕрлĕ мерăсем йышăнать. Вĕсенчен пĕри – «Чăваш Республика территорийĕнче тăлăх ачана çемьене илнĕ граждансене укçапа пулăшасси çинчен» закон. Ачана усрава илнĕ хыççăн 3 çул иртсен çемьесем пĕр хутчен тÿлекен 300 пин тенкĕпе усă курма пултарни – курăмлă пулăшу.

Патшалăх енчен ачаллă çемьесене пулăшу парас тесе тепĕр саккун та йышăннă. Ăна тĕпе хурса кăçалтан ашшĕ-амăшĕ виççĕмĕш ачашăн тата усрава илнĕ виççĕмĕш ачашăн виçĕ çула çитиччен кашни уйăхра республика хыснинчен 5504 тенкĕлĕх пособи илĕ.

- Актуаллă тепĕр тема – Тăван çĕр-шывăн Аслă вăрçин ветеранĕсен пурăнмалли çурт-йĕр условийĕсене лайăхлатасси. Ку енĕпе Чăваш Енре, районта лару-тăру еплерех?

П.Краснов: - 2012 çулта Комсомольски районĕнче пурăнакан Аслă Аттелĕх вăрçин 21 ветеранĕ (салтак арăмĕсем те пур вăл шутра) хваттер е çурт туянма пĕр хутчен паракан пособие илнĕ. Тата асăннă çăмăллăхпа усă курма ирĕк пур 20 ветеран черетре. РФ Президенчĕн Указĕ вăя кĕнĕренпе пирĕн районта 91 çын çак сертификатпа усă курса çĕнĕ хваттерлĕ пулнă. Республикипе вара 860 ветеран пурăнмалли условисене лайăхлатнă. Хальлĕхе çак тÿлевĕн виçи 1 млн та 6 пин те 200 тенкĕпе танлашать, ăна кварталсерен индексацилесе пыраççĕ.

- 2012 çулта Комсомольски районĕнче вĕренÿ учрежденийĕсене модернизацилес ĕç аван пычĕ. Тĕрлĕ шайри бюджетран – федераллă тата республика хыснинчен – шкулсене юсаса çĕнетме укçа уйăрнинче сирĕн тÿпе те пурах. Кунсăр пуçне пĕлтĕр 2 объектра строительство ĕçĕсем пуçланчĕç...

П.Краснов: Чăнах та, пирĕн тăрăхри шкулсене модернизацилеме тĕллевлĕ икĕ программăпа района укçа-тенкĕ килчĕ. Акă Комсомольски 2-мĕш, Урмаел тата Шурут вăтам шкулĕсенчи юсав ĕçĕсене пурнăçлама федераллă бюджетран 6 млн ытла тенкĕ пачĕç. Комплекслă юсав ĕçĕсем тумалли программăпа Александровка тĕп, Çĕнĕ Мăратпа Хырай Ĕнел вăтам шкулĕсем валли те республика бюджетĕнчен 4 млн тенкĕ хушса панă.

- Çĕнĕ объектсем пирки мĕн калама пултаратăр?

К.Мифтахутдинов: - Комсомольски районĕ тĕрлĕ инвестици проекчĕсене те хутшăнать. Акă район администрацийĕпе пĕрле тачă ĕçлесе иртнĕ çул Тукай Мишерĕнче шкул çумне тĕкĕлесе 60 вырăнлăх ача сачĕ, шкул валли столовăй, спортзал тумалли проект хут çинчен чăн пурнăçа куçрĕ. Ку строительство валли малтанласа 20 млн тенкĕ палăртнăччĕ, çулталăк вĕçĕнче тата хушма 34,5 млн тенкĕ пачĕç. Ăна кăçал çуркунне туса пĕтерсе хута яма палăртнă, çакăн валли 2013 çулăн бюждетне 10 млн тенкĕ хывнă.

П.Краснов: - Комсомольскинче 145 вырăнлăх ача сачĕ тăвасси пуçланнине асăнмасăр иртме çук. Строительствине пĕлтĕр пуçланă, укçине вара, 75 млн тенкĕ, республикăн кăçалхи бюджетне кĕртсе хăварма тăрăшатпăр. Район центрĕнчи çĕнĕ ача сачĕн алăкĕсем кăçалах уçăлĕç. Икĕ объектĕнче те тĕп подрядчик – «Арка» ООО. Ăна хамăрăн ентешĕмĕр, Кайнлăкра çуралса ÿснĕ Фагиль Шарафутдинов ертсе пынине палăртма кăмăллă. Элпуç вăтам шкулĕн строительствине вара 2014 çулта пуçлама май килĕ, вăл 165 ача вырнаçмалăх пулĕ.

Çакăн пек пысăк, сулмаклă ĕçсене пурнăçлама пултарни эпир район администрацийĕн пуçлăхĕпе пĕрле пĕр шухăшлă пулса тĕрлĕ министерствăсемпе, ведомствăсемпе тухăçлă ĕçленинчен килчĕ. Ял поселенийĕсен пуçлăхĕсене те кирлĕ утăмсене вăхăтра тунăшăн, пĕр-пĕрне ăнланса тăрăшнăшăн тав тăвас килет.

- Районта иртекен уявсенче, тĕрлĕ спорт ăмăртăвĕсенче те яланах курма пулать сире. Эсир хăнана çеç килместĕр, чылай чухне - çав мероприятисен спонсорĕсен шутĕнче те...

– Тăван района килме, ентешсемпе тĕл пулма кирек хăçан та кăмăллă, çавăнпа хутшăннă, хутшăнатпăр та уявсене, ăмăртусене, канашлусене тата ыттине те. Тăван район малалла аталанни савăнтарать, суйлавçăсен шанăçне тÿрре кăларассишĕн пĕтĕм вăй-хала хурса тăрăшас кăмăла çĕклет.

– Петр Степанович, Кияметдин Садыртдинович, тавах сире калаçушăн.

Л.ШУРЯШКИНА